Prof. Piet Strauss (NG Kerk-moderator) se standpunt rakende evolusie maak Dr. Jurie van den Heever (paleontoloog by die Universiteit van Stellenbosch) vreeslik moerig. Onthou, die woord “evolusie” verskyn nêrens in Die Bybel, dus is dit logies dat Strauss op wetenskaplike tone sóú trap. Ek verwerp die Big Bang-teorie àl jare omdat geen sterfeling IETS uit NIKS kan maak nie – God het die heelal en alles daarin geskape. Punt. Evolusie het tot stand gekom as gevolg van ‘n ateïs (Darwin) en danksy sy teorie probeer evolusionêre wetenskaplikses nóg steeds om ‘n alternatief vir die Skepping te vind. Hier is my mening oor Die Bybel/evolusie-debat:

  • “Die dwaas sê in sy hart: Daar is geen God nie” (Psalm 14:1/53:1). Soos ons kan aflei is hierdie nie ‘n kraakvars debat nie. Ek glo in God, nie aan ooms en tannies met brille en wit jasse nie. Die Bybel beskou iemand wat nie in God glo nie as ‘n “dwaas” – is jy een?
  • “Omdat hulle, alhoewel hulle God geken het, Hom nie as God verheelik of gedank het nie, maar hulle het dwaas geword in hul oorlegginge, en hul onverstandige hart is verduister” (Romeine 1:20). Opgesom: as jy God verwerp gaan jy jou gat sonder ‘n spieël sien.
  • Lees mooi: “Die vrees van die Here is die beginsel van kennis, sotte verag wysheid en tug” (Spreuke 1:7). Sonder God is daar daar GEEN kennis. Waar kom jóú hulp vandaan?

Kate Moss glo dit spook by haar huis in Londen en het ‘n exorcist aangestel om van die “evil energy” ontslae te raak. Eish. Waarom publiseer ek hierdie onsamehangende tjol? Waarom lek ‘n hond sy knaters? As saamsteller van hierdie blog is dit my prerogatief om lukraak onderwerpe te publiseer.

In die gees van onsamehangende onderwerpe, hier is Nella se jongste bydrae tot frankbotha.com.
Volgens navorsing praat vroue 3 keer meer as mans. ‘n Vrou gebruik ongeveer 20 000 woorde per dag – 13 000 meer as ‘n man. Vroue praat ook vinniger as mans en spandeer meer energie op skinderstories omdat vroue glo genot daaruit put om hulle eie stem te hoor. Ek weet nie of hierdie “feite” my maak lag of maak huil nie. Navorsers beweer dat ‘n vrou se brein meer selle bevat wat spraakfunksies behartig as wat ‘n man s’n. Eenvoudige spraak veroorsaak ‘n reaksie van hormone in ‘n vrou se brein wat gelykstaande is aan ‘n reuse dosis dwelms. Hierdie storie verduidelik seker waarom ons vroue so lekker kan gesels. Wie van julle onthou Mev. Ples? Die skedel was ontdek deur Dr. Robert Broom en John T. Robinson op 18 April 1947. Aanvanklik was geglo dat Mev. Ples ‘n vrou was, maar vandag word dit in twyfel getrek. Daar was geglo dat die skedel aan ‘n vrou behoort het bloot weens ‘n “stewige” kakebeen. Vroue is geseën met spraakvermoë. Nou wonder ek in my stilligheid of mans ook op ‘n stadium “stewige” kakebene sal aangroei? Dankie vir jou bydrae, Nella. Het sy ‘n punt beet?

Ek soek ‘n Rottweiler genaamd Mietsie. Òf, laat ek dit só stel, ek wil ‘n Rottweiler koop wat “Mietsie” gaan heet. Die geslag is irrelevant omdat Mietsie selfs ‘n fors naam vir ‘n reen is. Wat dink jy? Hoeveel kos Rottweiler-wolle rofweg en waar kan ek een koop? Laat weet. Ander moontlike toekomstige troeteldiere in die Botha-huishouding sluit in ‘n kat genaam “Kietsie”, ‘n skool Piranhas genaamd “Julius” en/of voëls (verkieslik budgies) genaamd “Silwer Valke”. Maar cute Mietsie is heelbo aan my lys. Kyk net hoe oulik gaan sy lyk (regs).

Dankie vir die saamlees. Ons chat weer môremiddag 12:00.
Frank Botha